حکیم دوست محمد صابر ملتانیؒ کا شمار طب مشرق کے ان عظیم ماہرین میں ہوتا ہے جنہوں نے طب کو ایک نیا علمی، فکری اور سائنسی رخ دیا۔ آپ نہ صرف ماہر معالج، بلکہ محقق، مفکر، مربی اور روحانی طبیب بھی تھے۔ آپ نے اپنے تجربات، مشاہدات اور فطری فہم کی بنیاد پر “قانونِ مفرد اعضاء” کا نظریہ پیش کیا، جو آج ہزاروں معالجین اور اداروں کی رہنمائی کر رہا ہے۔

 علمی خدمات و تحقیقی ورثہ

حکیم صاحبؒ نے زندگی بھر سادہ، فطری اور آسان علاج کے فروغ کے لیے کام کیا اور کئی اہم کتابیں تحریر فرمائیں جن میں

تحقیقات المجربات

تین انسانی زہر

تحقیقات اعادہ شباب

تحقیقات تپ دق و خوراک

نظام علاج بالغذا

یہ اور دیگر درجنوں  کتب  اور رسائل طب کے سنجیدہ طلباء اور معالجین کے لیے خزانہ علم ہیں۔

آپ نے “طبی تحقیقاتی ادارہ ملتانی” کے تحت علم و عمل کا ایک نیا باب رقم کیا، جہاں سینکڑوں شاگرد آپ کی نگرانی میں تربیت پا کر کامیاب معالج بنے۔

قانون مفرد اعضاء،ایک انقلابی نظریہ

حکیم صابر ملتانیؒ نے انسانی جسم کو تین بنیادی مفرد اعضاء (اعصاب، عضلات، غدد) پر تقسیم کر کے بتایا کہ تمام امراض کی جڑ انہی میں خرابی ہوتی ہے۔ اگر ان میں توازن بحال کر دیا جائے تو جسم خود صحت کی طرف لوٹ آتا ہے۔ یہ سادہ مگر سائنسی نظریہ آج لاکھوں لوگوں کی شفا کا ذریعہ بن چکا ہے۔

عالمی اثرات

آپ کے نظریات پر مبنی علاج آج نہ صرف پاکستان بلکہ بھارت، بنگلہ دیش، یورپ، امریکہ اور خلیجی ممالک میں ہزاروں حکیم اور نیچروپیتھس اختیار کر رہے ہیں۔ آپ کے نسخہ جات، طریقہ علاج اور تدریسی مواد کو بین الاقوامی سطح پر تسلیم کیا جاتا ہے۔

 اخلاق، کردار اور روحانیت

آپ صرف معالج نہیں بلکہ ایک درویش صفت بزرگ، اخلاق و اخلاص کا پیکر اور بندگانِ خدا کے سچے خیر خواہ تھے۔ آپ کا ہر نسخہ، ہر تدبیر، ہر تعلیم خالص نیت، تجربے اور تحقیق پر مبنی ہوتی تھی۔